اخطفني ياللي تحبني ع الحصان
الدنيا قالت يوم في ماضي الزمان
اخطفني ياللي تحبني ع الفرس
الدنيا قالت.. قام خطفها الشيطان
عجبي!!

من بين شقوق الشيش وشقشقت لك
مع شهقة العصافير وزقزقت لك
نهار جديد أنا.. قوم نشوف نعمليه
انا قلت يا ح تقتلني.. يا ح اقتلك
عجبي!!

قلبي عليل يا ناس وفي الكاس دواه
مديت له ايدي شربت م اللي حواه
جنبي الشمال خف.. اليمين اتوجع
وإيه يداوي الكبد م اللي كواه
عجبي!!

جالك أوان ووقفت موقف وجود
يا تجود بده يا قلبي بده تجود
ما حد يقدر يبقى على كل شيء
مع إن- عجبي- كل شيء موجود
عجبي!!